Plantun de Prouvènço

Pèr coumpara dos planto d'encò nostre

Stellaria nemorum subsp. montana & Scleranthus annuus

Stellaria nemorum subsp. montana

Caryophyllaceae

Nom en français : Stellaire à graines barbues.

Descripcioun :
L'esteleto-de-mountagno trachis dins li bos fres. Sèmblo un mourihoun en mai grand (petalo mai longo que sepalo) ; coume éu la tijo èi roundinello, mai eici èi peludo. Li fueio de la baso soun en cor emé un long pecou au contro di bratèio qu'embrasson quàsi la cambo. Dins la subsp. nemorum li bratèio en formo de fueio soun de mai en mai pichoto à flour e mesuro que mountas dins la planto, alor qu'eici tre li segoundo s'atrovon èstre tóuti pichoto. Apoundèn que li fueio soun eici mai verdo.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai. Tant se pòu que siegue manjadisso e vertuouso coume soun cousin lou mourihoun.

Port : Erbo
Taio : 20 à 50 cm
Fueio : óupousado
Tipe bioulougico : Emicriptoufite
Cicle bioulougico : Planto renadivo

Gènre : Stellaria
Famiho : Caryophyllaceae

Ordre : Caryophyllales

Coulour de la flour : Blanco
Petalo : 5
Ø (o loungour) flour : 15 à 20 mm
Flourido : Printèms - Estiéu

Sòu : Ca (Si)
Autour basso e auto : 400 à 2200 m
Aparado : Noun
Jun à avoust

Liò : Bos fres - Prado à rousèu - Prado umido
Estànci : Mountagnard à Subaupen
Couroulougi : Éurosiberiano
Ref. sc. : Stellaria nemorum subsp. montana (Pierrat) Berher, 1887

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.